دہری شہریت کیس:اقربا پروری پر تقرریاں ہوں گی تو مداخلت کریں گے‎



News Desk

سپریم کورٹ میں وزیر اعظم کے معاون خصوصی زلفی بخاری کی دہری شہریت سے متعلق کیس کی سماعت ہوئی۔ وکیل اعتزاز احسن نے زلفی بخاری کی کامیابیوں کی تفصیلات کمرہ عدالت میں پڑھ کر سنائیں اور کہا زلفی بخاری وزیراعظم کے معاون خصوصی ہیں زلفی بخاری کی فلموں کو ایوارڈ مل چکے ہیں۔


چیف جسٹس نے کہا یہ بتائیں پاکستان میں زلفی بخاری کب مشہور ہوئے۔دہری شہریت کے معاملے پر افضال بھٹی کو بھی فارغ کیا تھا وہ بھی سمندر پار پاکستانیز محکمے کے مشیر تھے دیکھنا ہے دہری شہریت والا مشیر رہ سکتا ہے یا نہیں؟  زلفی بخاری کی دہری شہریت کیس میں چیف جسٹس نے کہا دیکھنا ہوگا مشیر رہ سکتے ہیں یا نہیں۔اقربا پروری پر تقرریاں ہوں گی تو مداخلت کریں گے۔کسی کو افسوس ہوا ہےتو فیصلے تبدیل نہیں کرسکتے۔پہلے بھی افضال بھٹی کو فارغ کیا تھا۔

اعتزاز احسن نے کہا ایسے پاکستانیوں کی حوصلہ افزائی ہونی چاہیئے۔ چیف جسٹس نے کہا سچے پاکستانیوں کی حوصلہ افزائی ہونی چاہیئے ایسے نہیں جو جہاز میں پاکستان سے کسی کو لینے آتے ہیں۔

سپریم کورٹ میں زلفی بخاری کی نااہلی سے متعلق کیس کی سماعت شروع ہوئی تو ان کی جانب سے اعتزاز احسن بطور وکیل پیش ہوئے. اس موقع پر درخواست گزار عادل چھٹہ نے استدعا کی کہ میرے وکیل علاج کے لیے امریکا گئے ہیں اس لیے سماعت 15 دسمبر تک ملتوی کی جائے۔

چیف جسٹس نے استفسار کیا زلفی بخاری پاکستان میں کب متعارف ہوئے۔ لائم لائٹ میں کب آئے جس پر وکیل اعتزاز احسن نے مؤقف اختیار کیا کہ زلفی بخاری وزیراعظم کے معاون خصوصی ہیں رکن اسمبلی نہیں جن کا پروفائل عدالت میں پیش کر دیا ہے۔

چیف جسٹس نے کہا شاید زلفی بخاری پہلی بار نظروں میں تب آئے جب ایک معاملہ ہوا اور وہ کسی کو لینے گئے تھے جب کہ درخواست گزار نے کہا طلاق کے بعد لندن میں ریحام سے ملاقات کے موقع پر وہ پہلی بار لوگوں کی نظروں میں آئے۔

وکیل زلفی بخاری اعتزاز احسن نے اعتراض اٹھاتے ہوئے کہا طلاق نجی معاملہ ہے اسے زیر بحث نہ لایا جائے۔ زلفی بخاری لندن میں پاکستانی کمیونٹی میں بہت متحرک رہے ہیں۔حکومت کے پہلے 100 دن میں اس نوجوان نے بہترین کارکردگی دکھائی۔

وکیل اعتزاز احسن نے یہ بھی کہا کہ زلفی بخاری نے تعیناتی سے اب تک ساری تنخواہ ڈیم فنڈ میں دی ہے جس پر چیف جسٹس نے مسکراتے ہوئے کہا یہ تو بہت اچھا کیا۔

اس موقع پر درخواست گزار عادل چھٹہ نے کہا کہ کہنے کو یہ وزیراعظم کے مشیر برائے بیرون ملک پاکستانیز ہیں لیکن یہ ای او بی آئی کے بورڈ کی میٹنگز میں بھی بیٹھتے ہیں جس پر چیف جسٹس نے کہا کہ کل کو حکومت کو بھگتنا ہے کہ کتنے اچھے لوگ لگائے اور کتنے نہیں۔ہمارا اس سے تعلق نہیں ہم تو صرف یہ دیکھنا چاہتے ہیں کہ کیا تقرر قانون کے تحت ہوا یا نہیں۔

اس موقع پر چیف جسٹس نے کہا اگر تقرری میں اقرباء پروری ہوگی تو ضرور عدالتی جائزہ لیں گے۔ ایک فیصلے میں لفظ اقرباء پروری استعمال کیا تو بہت لے دے ہوئی کسی کو افسوس ہوا ہے تو اس کے لیے عدالتی نظام میں تبدیلی نہیں کر سکتے۔

چیف جسٹس نے کہا ہمارا کام انتظامیہ کی تضحیک کرنا نہیں۔غالباً کسی نے ان کو بتایا ہی نہیں کہ یہ مقدمہ کووارنٹو کا ہے۔ اقربا پروری تو ایک گراؤنڈ کے طور پر زیر بحث آیا تھا جب کہ درخواست گزار نے تو اقربا پروری کا ایشو اٹھایا ہی نہیں تھا۔

یاد رہے کہ وزیراعظم عمران خان نے سینئر صحافیوں کے ایک پینل کو حالیہ انٹرویو کے دوران شکوہ کیا تھا کہ انہیں چیف جسٹس کی جانب سے اقربا پروری کے ریمارکس پر بے حد افسوس ہوا۔

عدالت نے زلفی بخاری کیس کی سماعت 26 دسمبرتک ملتوی کر دی

Leave a Reply

Your email address will not be published. Required fields are marked *